رسالة ‏مهمة

أهلاً بك آلاء

أولاً أنا أكن لك كل الاحترام ومقدر فعلاً كتابتك ليا ومقدر قدرتك على التفكير وشجاعة الاعتذار وشجاعة التوضيح والتعبير ..

أنا يا آلاء يمكن لما كتبتي لي "على فكرة أنا بحترمك جداً" أنتي مش متخيلة ده فرق معايا ازاي .. خليني اكلمك بصراحة بدون تحميل ولا زعل .. أكيد يا آلاء التعامل بينا كان سئ جداً كل طرف فينا في وادي ووصل لمستويات مكناش نتمنى أنه يوصلها حتى على مستوى الذوق الطبيعي في التعامل .. بشكل كبير أنا بشوف نفسي فعلاً فاشل في التعامل وفاشل في المسئولية بنسبة كبيرة ومبحبش الفشل وفي نفس الوقت بحبش التعلم .. يعني اديكي مثال يا آلاء أنتي فعلاً معندكيش مشكلة كآلاء في حاجة والله انتي فعلاً كويسة جداً ومالية عيني وتملي عين الشمس يا آلاء .. بس الفكرة أن أنا فعلاً في كتير بديهيات بعرف اتعامل فيها .. ويمكن كونها بديهيات يا آلاء بتشجعني في منظومة مخي على تجاهلها أصلاً .. يعني انتي ضربني مثال أنه ليه بقولش كلمة كذا في وقت كذا .. وانك بتكوني مستنياها .. بس هي بديهية يعني انتي عارفة الكلام اللي هقوله .. أنتي بس عاوزة تسمعيه مني .. عارفاه بس عاوزة تسمعيه 

معلش والله يا آلاء على كلامي دلوقتي أنا مش بقوله بغرض تفتيح أي كلام بس هو بغرض توضيح فعلاً يعني أنا طول الوقت كنت بقول يعني هي معقولة انها مش عارفة انك بتحبها ما أكيد عارفة واكيد كل اللي بتقوله ده من ورا قلبها وانت عارفعا يعني

.. واكلمك بصراحة يا آلاء أنا مكنتش الشخص اللي بيعرف يعبر لآلاء عن واحد في المليون هو شايفها جميلة ازاي .. ولا أنتي يا آلاء كنتي بتدي محمد مساحة الأمان في الكلام اللي تخليها يقول على طبيعته .. مقصدش الأمان بمعنى خوف بس أقصده بمعنى راحة وعدم تحسيس على حاجة خوفاً من أي رد فعل معين يسئ الأمور معه

أزعم أني تعاملت بحكمة مع حاجات كتير وحاجات تانية يا آلاء لأ.

وأنتي يا آلاء كتير تبقي فعلا تقولي كلام سئ جداً ويبقى الوقت فيه كلام مش عاوزة ومش عاوزة وووو وبعد ما يهدأ عنك فورة الغضب تنسي أثر كلامك وطريقتك وتفضلي مستغربة عدم حصول اللي كان بديهي يحصل ...  أنا ضاع حبي لك في استحمال .. وأنتي صاع حبك لي في انتظار بديهيات

انتي بجد، بجد والله بعيدا عن أي حاجة اجمل حد في الدنيا .. بجد .. ليكي شوية تصرفات غريبة وغير محكمة لكن بصدق بصدق من قلبي والله انتي حد جميل جداً جداً والله 

مثال يا آلاء عن حاجة مهمة زي حفل التخرج أنا قلت لك هتعيطي من الفرحة وأنتي قلتي لي أن حجز الأماكن خلص .. وأنا كنت مقرر أن اليوم ده هيكون يوم نلبس فيه الشبكة كلها ويكون بمثابة خطوبة حقيقية جديدة .. مش فكرة اقول أو اتكلم أو اتواصل أو لأ بس فكرة أنه فعلا قلت لك هيكون يوم جميل وأنا مسئول عن ده يبقى . بعدها نقطة .. صحيح. إن العلاقات بتمسيش كده والله بس ده أنا يا آلاء كنت هتعتمل معه بطريقة أنسب

ساعات كتير كنت بقول بجد: ما ترضي بعيوبي وخلاص ليه لازم كل حاجة زي ما بتحبي على مزاجك؟ ما أنا لو عاوزك زي ما بحب على مزاجي هتتعبي برضه بس الواحد بيشوف اللي قدامه وياخد منه الحلو ويحب الوحش أو يتقبله

يعني عمو عبدالرحمن راجل غريب قوي بس طنط ناهد فعلا محتوياه قوي قوي قوي ومجبره الناس على التعامل مع سذاجته دي بصورة كبيرة ومحترمه .. 

مقصدي أن على مزاجي هتتعبي بمعنى غير أنه لو أنا حطيت حاجة هي مش في طبيعتك أنها أولوية عندي هتتعبي في تنفيذها وأنا يمكن مش طبيعتي الكلام مش طبيعتي الحكي والمشاركة الكتير بس هل تفتكري أني في يوم يا آلاء قصرت في التغير والمحاولة والعلاج بأي صورة؟

المشكلة يا آلاء في مساحة للقرب الزايدة اللي مكنتش من حقنا أنا آسف عنها والله العظيم أنا مخطط أني مهما جرى أني اطلع عمرة مخصوص واستغفر لنا عند قبر النبي وربنا يغفر لك ولي يا آلاء .. وما ترتب على ذلك من حاجات كتير قوي في طريقة تعاملنا من افتراض أن الحل النهائي بيكون في القرب بالطريقة دي وده كان بيضعف كل الحلول التانية أظن ذلك

أنا كتير كنت عاوز اصرخ واقول اني مش مسترح في التعامل مش مسيطر عالحياة مش مسيطر على العلاقة دي .. كنت عاوز اقول كفاية شكوى وتذكر من الماضي اللي لا أملك له عصا سحرية يا آلاء غير الحاضر اللي كنت مع الدكتورة والله بوصل فيه لحاجات كتير كويسة.

على كل حال يا آلاء أنا متأكد أن نقاط الالتقاء بينا أكبر بكتير قوي من نقاط الخلاف كعدد .. لكن الاختلاف في التعامل والتناسب أخطر بكتير من كل حاجة. في الدنيا .. أنا مش عاوز أن الموضوع يدخل فيه العقل قوي مكنتش احب أنه يبقى حاجة محسوبة بالورقة والقلم كنت أحب أن الفردية بتاعتنا تفضل مكملة وسايقة عبقرية التجربة الفريدة بتاعنا.. أنا حبيتك بجد يا آلاء والله بكن لك كل التقدير والاعتزاز وبجد أنتي حاجة غالية قوي عندي كنتي وهتفضلي .. وأنا عارف أن كل الكلام وقت الخير بيكون جميل ووقت المشكلة بتبان شدة صعوبة التعامل من ناحيتي بطريقة سلبية كبيرة

اتمنى لك من كل قلبي كل التوفيق في كل ورق الجراحة وامتحاناته .. واتمنى من كل كل كل قلبي لك الراحة يا آلاء .. والهدوء .. انك تهدي على نفسك وعلى الدنيا .. أنتي مش محتاجة تثبتي لحد حاجة أنتي جميلة وذكية وهتكوني ناجحة جداً جداً جداً .. والدنيا لو انتي اتشقلبتي على راسك مش هتتغير عشانك .. لكن أنتي يا آلاء المهم من جواكي أنتي تركزي على الصح وعلى المهم .. وتوسعي صدرك للتسامح والقبول .. وتدربي نفسك عمليا يا آلاء على انك تبقي الدنيا بإيجابية تليق بيكي يا آلاء .. أنا كمان هفضل هنا لو عاوزة أي حاجة بمعنى أي حاجة

لكي عندي 8000 جنيه (كتبت رسالة بهم لمحمود عادل أول ما تعبت عشان يفتكر يديهوملك لو لاقدر الله حصل لي شئ .. بس ارجعهم لك او لطارق أول ما أقوم إن شاء الله) 

أنا مش هقول عنك غير أنك أكثر شخص مثالي ودي الحقيقة .. بس المشكلة كانت أني فعلاً مش عارف اتعامل .. وبجد ابقي اديني نصائحك لما وقتك يسمح للتعامل والحياة لأن انا فعلا يهمني ده .. مش كابن ليكي .. لكن كصديق فعلاً بيثق فيكي كل الثقة.

مع السلامة دلوقتي يا آلاء .. ولنا كلام آخر أكيد في وقت لاحق